قــلب مــجروح

قسيت عليّ يا زمن دون ذنب أجنيه
خليتني من القهر دايم الرأس أحنيه
فضحني الألم وعن الناس ما أخفيه
كل حكى بحالي و مافي شي أسويه

حرمتني حبيبي وغصب عني أخليه
بعد ما كان دنيتي وكل عمري يمليه
أبكي عليه الليالي وكل وقتي أناديه
أسمع صدى صوته وحولي ماألاقيه

عشت مع خلَي سنين بالسعد أمنَيه
بلأمل والحلم كل يوم ولحظة أدعيه
وقصر الهنا والمنى يده بيدي أبنيه
مهما وصفت الفرح ماقدرت أوفيه

إن تعب يوم أنا طبيبه بروحي أداويه
وفي برد الشتا أضمه لصدري أدفيه
كنت له حبيب بالأنس والسمر أسليه
أزيل عنه الكدر ومن الأحزان أنسيه

حرام عليك يا قدر من كل إلي تسويه
أنين شوقي اشتعل ماني قادر أطفيه
حزني على فرقة حبيبي وكيف أبكيه
دموع العين والقلب تسيل وما ترويه

أدعي ربي بألم وبجوف الليل أناجيه
ليرجع لي حبيبي دوم وبالقلب أفديه
أبقى معاه باقي العمر أسعده وأهنيه
ولو طلب نظر عيني وروحي أعطيه